CSK అభిమానులు ఎగిరిగంతేసే వార్త.. కీలక మ్యాచ్ ముందు బూస్ట్..!
ఐపీఎల్ 2024లో డిఫెండింగ్‌ ఛాంపియన్‌ చెన్నై సూపర్‌ కింగ్స్ మిశ్రమ ఆటతీరు కనబరుస్తోంది. ఒక మ్యాచ్‌లో గెలవడం, మరో మ్యాచ్‌లో ఓడటం అన్నట్లుగా ఆ జట్టు పరిస్థితి తయారైంది. ఈ సీజన్‌లో ఆడిన పది మ్యాచుల్లో సీఎస్కే.. ఐదింట్లో విజయం సాధించింది. దీంతో పాయింట్ల పట్టికలో ఐదో ప్లేసులో నిలిచింది. ఈ పరిస్థితుల్లో ఇకపై ఆడే నాలుగు మ్యాచుల్లో కనీసం మూడింట్లో గెలిస్తేనే ఆ జట్టు ప్లే ఆఫ్స్‌ అవకాశాలు మెరుగ్గా ఉంటాయి.
ఈ నేథపథ్యంలో ఆదివారం పంజాబ్ కింగ్స్‌తో ఆ జట్టు తలపడనుంది. అయితే ఈ మ్యాచ్‌కు ముందు చెన్నై సూపర్‌ కింగ్స్‌కు గుడ్‌న్యూస్‌ అందింది. టీ20 ప్రపంచకప్‌ 2024కు వీసా ప్రాసెస్‌ కోసం జట్టును వీడిన శ్రీలంక స్టార్ బౌలర్లు మతీశ పథిరన, మహేశ్ తీక్షణలు తిరిగి జట్టులో చేరారు. వీరిద్దరూ పంజాబ్‌తో మ్యాచ్‌లో ఆడనున్నారు. ఈ మేరకు వీరిద్దరూ మ్యాచ్ వేదిక అయిన ధర్మశాలకు చేరుకున్నట్లు చెన్నై సూపర్‌ కింగ్స్ తన అధికారిక సోషల్‌ మీడియా ఖాతా ద్వారా వెల్లడించింది.
వాస్తవానికి ఏప్రిల్‌ 28న మ్యాచ్ తర్వాత సీఎస్కేకు ఐదుగురు బౌలర్లు దూరమయ్యారు. జాతీయ జట్టుకు ఆడేందుకు గానూ ముస్తాఫిజుర్ రెహ్మాన్, గాయంతో దీపక్ చాహర్‌లు ఈ టోర్నీ మొత్తానికి దూరమయ్యారు. తుషార్ దేశ్‌పాండేకు జ్వరం రావడంతో ఆతడు కూడా ప్రస్తుతం జట్టుకు అందుబాటులో లేడు. వీసా ప్రాసెస్‌కు కోసం మతీశ పథిరన, మహేశ్ తీక్షణలు సైతం జట్టును వీడటంతో ఆ జట్టు ఫ్యాన్స్‌ కంగారు పడ్డారు. కానీ వీరిద్దరూ తిరిగి జట్టులో చేరడంతో ఊపిరిపీల్చుకున్నారు. ఆదివారం జరిగే మ్యాచ్‌లో పంజాబ్‌ను ఓడించి.. ప్లే ఆఫ్స్‌ అవకాశాలను మెరుగుపర్చుకోవాలని సీఎస్కే భావిస్తోంది. మధ్యాహ్నం 3.30 గంటలకు మ్యాచ్ ప్రారంభం కానుంది.
ఐపీఎల్ 2024 కోసం సీఎస్కే జట్టు:
రుతురాజ్ గైక్వాడ్ (కెప్టెన్), అజింక్య రహానె, షేక్ రషీద్, సమీర్ రిజ్వీ, మొయిన్ అలీ, డేరిల్ మిచెల్, రచిన్ రవీంద్ర, నిషాంత్ సింధు, శివమ్ దూబె, రవీంద్ర జడేజా, మిచెల్ శాంట్నర్, ఎంఎస్ ధోనీ, అరవెల్లి అవనీశ్, అజయ్ జాదవ్ మండల్, ఆర్ఎస్ హంగార్గేకర్, దీపక్ చాహర్, ముకేశ్ చౌదరీ, ప్రశాంత్ సోలంకి, శార్దుల్ ఠాకూర్, ముస్తాఫిజుర్ రెహ్మాన్, సిమర్జీత్ సింగ్, మతీశ పథిరన, తుషార్ దేశ్ పాండే, మహీశ్ తీక్షణ, రిచర్జ్ గ్లెసన్
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-05-04T17:27:01Z dg43tfdfdgfd
