RCB హ్యాట్రిక్ విక్టరీ.. పాయింట్ల పట్టికలో 7వ స్థానానికి, ప్లేఆఫ్స్ ఆశలు సజీవం

ఐపీఎల్‌ 2024లో మిణుకుమిణుకు మంటున్న ప్లేఆఫ్స్‌ ఆశలను సజీవంగా ఉంచుకుంటూ రాయల్‌ ఛాలెంజర్స్‌ బెంగళూరు జట్టు హ్యాట్రిక్‌ విజయాలను నమోదు చేసింది. శనివారం సొంతగడ్డపై గుజరాత్‌ టైటాన్స్‌తో జరిగిన మ్యాచ్‌లో 4 వికెట్లు తేడాతో ఘన విజయం సాధించింది. గుజరాత్‌ నిర్దేశించిన 148 పరుగుల లక్ష్యాన్ని మరో 38 బంతులు మిగిలి ఉండగానే ఛేదించింది. హైదరాబాదీ పేసర్ మహ్మద్ సిరాజ్ ‘ప్లేయర్ ఆఫ్ ది మ్యాచ్’గా నిలిచాడు.

148 పరుగుల లక్ష్యంతో బరిలోకి దిగిన రాయల్‌ ఛాలెంజర్స్‌ బెంగళూరుకు అదిరే ఆరంభం దక్కింది. ఓపెనర్లు ఫాప్‌ డుప్లెసిస్‌, విరాట్‌ కోహ్లీలు పోటీపడి బౌండరీలు బాదడంతో స్కోరు బోర్డు పరుగులు పెట్టింది. వీరిద్దరి ధాటికి ఆర్సీబీ 5.4 ఓవర్లలో 92/0తో నిలిచింది. ఫాఫ్‌ డుప్లెసిస్‌ (23 బంతుల్లో 64), విరాట్‌ కోహ్లీ (27 బంతుల్లో 42 రన్స్‌) చెలరేగారు. దీంతో పది ఓవర్లలోపే మ్యాచ్‌ ముగుస్తుందని అంతా భావించారు. కానీ స్వల్ప వ్యవధిలో వికెట్లు తీసిన గుజరాత్‌ పోటీలోకి వచ్చింది. ఓ దశలో 92/0తో నిలిచిన ఆర్సీబీ.. 117/6తో నిలిచింది.

వేగంగా ఆడే ప్రయత్నంలో విల్‌ జాక్స్‌ (1), రజత్‌ పటీదార్‌ (2), గ్లెన్‌ మ్యాక్స్‌వెల్‌ (4), కామెరూన్‌ గ్రీన్‌ (1) స్వల్ప స్కోరుకే ఔట్‌ అయ్యారు. దీంతో గుజరాత్‌ టైటాన్స్‌ మ్యాచ్‌లోకి బలంగా వచ్చింది. కానీ దినేశ్‌ కార్తిక్‌ (12 బంతుల్లో 21), స్వప్నిల్‌ సింగ్‌ (9 బంతుల్లో 15) గుజరాత్‌ ఆశలపై నీళ్లు చల్లారు. దీంతో ఆర్సీబీ..13.4 ఓవర్లలో 6 వికెట్లు కోల్పోయి లక్ష్యాన్ని ఛేదించింది. గుజరాత్ బౌలర్లలో జాషువా లిటిల్‌ 4, నూర్‌ అహ్మద్‌ 2 వికెట్లు తీశారు.

అంతకుముందు బ్యాటింగ్ చేసిన గుజరాత్‌ టైటాన్స్.. 19.3 ఓవర్లలో 147 పరుగులకు ఆలౌట్‌ అయింది. షారుఖ్‌ ఖాన్‌ (37), రాహల్ తెవాటియా (35) రాణించారు. ఆర్సీబీ బౌలర్లలో మహమ్మద్‌ సిరాజ్‌ 2, యశ్‌ దయాల్‌ 2, విజయ్‌ కుమార్‌ వైశాక్‌ 2, కామెరూన్ గ్రీన్ 1, కర్ణ్‌ శర్మ1 వికెట్‌ తీశారు.

ఈ మ్యాచ్‌ విజయంతో ఆర్సీబీ రెండు పాయింట్లతో పాటు భారీ నెట్‌రన్‌రేట్‌ను సంపాదించుకుంది. దీంతో పాయింట్ల పట్టికలో పదో స్థానం నుంచి ఏడో స్థానానికి చేరింది. ఈ సీజన్‌లో ఆడిన 11 మ్యాచుల్లో నాలిగింట్లో గెలిచింది ఆర్సీబీ. మిగతా మూడు మ్యాచుల్లో గెలిస్తే ఆ జట్టుకు ప్లే ఆఫ్స్‌ అవకాశాలు ఉంటాయి.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-05-04T17:57:06Z dg43tfdfdgfd