కీలక మ్యాచులో లక్నో చిత్తు.. భారీ విజయంతో ప్లే ఆఫ్స్‌లో అడుగుపెట్టిన కోల్‌కతా..!

ఐపీఎల్ 2024లో అదిరే ప్రదర్శన చేస్తున్న కోల్‌కతా నైట్ రైడర్స్ ప్లే ఆఫ్స్ దిశగా మరో అడుగు ముందుకేసింది. ఆదివారం లక్నో సూపర్ జెయింట్స్‌తో జరిగిన మ్యాచులో ఘన విజయం సాధించింది. తొలుత బ్యాటింగ్ చేసిన కేకేఆర్.. సునీల్ నరైన్ (39 బంతుల్లో 81 రన్స్) విధ్వంసంతో 235/6 పరుగుల భారీ స్కోరు చేసింది. అనంతరం లక్నో సూపర్ జెయింట్స్‌ను 137 పరుగులకు కట్టడి చేసింది.

236 పరుగుల లక్ష్యంతో బరిలోకి దిగిన లక్నో సూపర్ జెయింట్స్ పవర్ ప్లే ముగిసే సరికి 55/1తో నిలిచింది. ఆ తర్వాత క్రమంగా వికెట్లు కోల్పోయి లక్ష్యానికి దూరమైంది. కేఎల్ రాహుల్ (25), మార్కస్ స్టోయినిస్ (36) ఫర్వాలేదనిపించారు. దీపక్ హుడా (5), నికోలస్ పూరన్ (10), ఆయుష్ బదోని (15), కృనాల్ పాండ్యా (5) విఫలమయ్యారు. దీంతో లక్నో జట్టు 16.1 ఓవర్లలో 137 పరుగులకు ఆలౌట్ అయింది. ఫలితంగా 98 పరుగుల తేడాతో చిత్తుగా ఓడింది.

అంతకుముందు బ్యాటింగ్ చేసిన కేకేఆర్‌ భారీ స్కోరు చేసింది. ఓపెనర్లు ఫిలిప్ సాల్ట్ (14 బంతుల్లో 32 రన్స్), సునీల్ నరైన్ (39 బంతుల్లో 81 రన్స్) అదరగొట్టడంతో 4.1 ఓవర్లలోనే 61 పరుగులు చేసింది. అనంతరం సాల్ట్ ఔట్ అయినా.. నరైన్ జోరు కొనసాగించాడు. చివర్లో రమణ్ దీప్ సింగ్ 6 బంతుల్లో 3 సిక్స్‌లు, 1 ఫోర్ సాయంతో 25 పరుగులు చేసి జట్టుకు భారీ స్కోరు అందించాడు. దీంతో కేకేఆర్ నిర్ణీత 20 ఓవర్లలో 235/6 పరుగులు చేసింది. లక్నో బౌలర్లలో నవీన్ ఉల్ హక్ 3 వికెట్లు, యశ్ ఠాకూర్ 1, రవి బిష్ణోయ్ 1, యుధ్వీర్ సింగ్ 1 వికెట్ తీశారు.

ఈ మ్యాచ్ విజయంతో కోల్‌కతా నైట్ రైడర్స్.. రాజస్థాన్ రాయల్స్‌ను వెనక్కి నెట్టి పాయింట్ల పట్టికలో అగ్రస్థానానికి చేరింది. 11 మ్యాచుల్లో ఎనిమిదింట్లో గెలిచి దాదాపుగా ప్లే ఆఫ్స్‌కు అర్హత సాధించింది.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-05-05T18:15:55Z dg43tfdfdgfd