టీ20 ప్రపంచకప్‌లో తలపడే అమెరికా జట్టులో ఏడుగురు మనోళ్లే..!

జూన్‌లో జరగనున్న టీ20 ప్రపంచకప్‌ కోసం అమెరికా క్రికెట్‌ బోర్డు 15 మంది సభ్యులతో కూడిన జట్టును ప్రకటించింది. అయితే ఇందులో కెప్టెన్‌తో పాటు ఏడుగురు భారత సంతతి ప్లేయర్లు ఉండటం గమనార్హం. అయితే ఈ జ‌ట్టులో భార‌త మాజీ అండ‌ర్‌-19 కెప్టెన్ ఉన్ముక్త్ చంద్‌కు చోటు ద‌క్క‌లేదు.

గుజరాత్‌ అండర్‌-19 జట్టుకు ఆడిన వికెట్‌కీపర్‌ బ్యాటర్‌ మోనాంక్‌ పటేల్‌ను అమెరికా క్రికెట్‌ బోర్డు తమ కెప్టెన్‌గా ప్రకటించింది. అమెరికా జట్టులో చోటు దక్కించుకున్న ఢిల్లీకి చెందిన మిలింద్‌ కుమార్.. 2018-19 రంజీ ట్రోఫీ సీజన్‌లో అత్యధిక పరుగులు చేసిన ప్లేయర్‌గా నిలిచాడు. ఆ సీజన్‌లో సిక్కిం తరపున 1331 పరుగులు చేశాడు. ఇక దేశవాళీల్లో దిల్లీ, త్రిపుర, సిక్కిం తరపున ఆడాడు. ఐపీఎల్‌లో అప్పటి దిల్లీ డేర్‌డెవిల్స్‌ (ప్రస్తుతం ఢిల్లీ క్యాపిటల్స్‌)తో పాటు రాయల్‌ ఛాలెంజర్స్‌ బెంగళూరు ప్రాతినిథ్యం వహించాడు. మెరుగైన అవకాశాల కోసం అతను అమెరికా వెళ్లాడు.

ముంబై మాజీ బౌలర్లు హర్మీత్‌ సింగ్‌, సౌరభ్‌ నేత్రవల్కర్ కూడా ఈ ప్రపంచకప్‌ జట్టుకు ఎంపికయ్యారు. 2012 అండర్‌-19 ప్రపంచకప్‌లో భారత్‌కు హార్మీత్‌ ఆడాడు. 2010 అండర్‌-19 ప్రపంచకప్‌లో కేఎల్‌ రాహుల్‌, జైదేవ్‌ ఉనద్కత్‌, మయాంక్‌ లాంటి ఆటగాళ్లున్న భారత జట్టులో సౌరభ్‌ నేత్రవల్కర్ ఉన్నాడు.

అయితే 2012 అండర్‌-19 ప్రపంచకప్‌లో భారత్‌ను గెలిపించిన కెప్టెన్‌ ఉన్ముక్త్‌ చంద్‌ మాత్రం అమెరికా జట్టులో చోటు దక్కించుకోలేకపోయాడు. 2014, 2016 టీ20 వ‌ర‌ల్డ్‌క‌ప్‌లో కివీస్‌కు ప్రాతినిథ్యం వ‌హించిన అండ‌ర్స‌న్.. ఈ టోర్నీలో అమెరికా తరఫున బరిలోకి దిగనున్నాడు. గతేడాది అతడు న్యూజిలాండ్ క్రికెట్ నుంచి ఎన్‌వోసీ తీసుకుని అమెరికాకు వెళ్లాడు. పాకిస్థాన్‌ సంతతి పేసర్‌ అలీ ఖాన్‌ కూడా అమెరికా తరఫున ఆడనున్నాడు.

అమెరికా జట్టులోని నితీశ్‌ కుమార్‌, నిసర్గ్‌ పటేల్‌, జెస్సీ సింగ్‌లు సైతం భారత మూలాలు కలిగి ఉన్నారు. మొత్తంగా టీ20 ప్రపంచకప్‌ కోసం అమెరికా ఎంపిక చేసిన 15 మంది సభ్యుల్లో ఏడుగురు భారత మూలాలు ఉన్నవారే కావడం గమనార్హం. అమెరికా, వెస్టిండీస్‌ వేదికల్లో జరిగే ఈ టోర్నీ జూన్‌ 1న ప్రారంభం కానుంది. టోర్నీలో భారత్‌, కెనడా, పాకిస్థాన్‌, ఐర్లాండ్‌తో కలిసి అమెరికా గ్రూప్‌- ఎ లో ఉంది. జూన్‌ 12న భారత్‌తో తలపడనుంది.

అమెరికా జట్టు: మోనాంక్‌ పటేల్‌ (కెప్టెన్‌), ఆరోన్‌ జోన్స్‌, ఆండ్రీస్‌ గౌస్‌, కోరె అండర్సన్‌, అలీ ఖాన్‌, హర్మీత్‌ సింగ్‌, జెస్సీ సింగ్‌, మిలింద్‌ కుమార్‌, నిసర్గ్‌ పటేల్‌, నితీశ్‌ కుమార్‌, కెంజిగె, సౌరభ్‌ నేత్రావల్కర్‌, షాడ్లీ, స్టీవెన్‌ టేలర్‌, షయాన్‌ జహంగీర్‌.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-05-04T10:55:57Z dg43tfdfdgfd