RCB VS KKR: ఆర్సీబీని వదలని దరిద్రం.. ఉత్కంఠ పోరులో ఒక్కపరుగు తేడాతో ఓటమి.. ఇక ఇంటికే..!

Kolkata Knight Riders: ఇండియన్ ప్రీమియర్‌ లీగ్‌ 2024లో రాయల్‌ ఛాలెంజర్స్ బెంగళూరు ఉత్కంఠ పోరులో ఒక్క పరుగు తేడాతో కేకేఆర్‌ చేతిలో ఓడిపోయింది. కోల్‌కతా వేదికగా జరిగిన ఈ మ్యాచ్‌లో తొలుత కేకేఆర్‌ 222/6 పరుగులు చేసింది. అనంతరం ఆర్సీబీ సరిగ్గా 20 ఓవర్లలో 221 పరుగులకు ఆలౌట్‌ అయింది. స్టార్క్‌ వేసిన చివరి ఓవర్‌లో 3 సిక్సర్లు బాదిన కర్ణ్‌ శర్మ.. మ్యాచ్‌ను తారాస్థాయికి తీసుకెళ్లాడు. కానీ అతడు ఔట్‌ కావడంతో ఆర్సీబీ ఒక్క పరుగుతో ఓటమిని చవి చూసింది.

అనంతరం 223 పరుగుల లక్ష్యంతో బరిలోకి దిగిన రాయల్‌ ఛాలెంజర్స్ బెంగళూరుకు తొలి 20 బంతుల్లోనే ఓపెనర్లు ఇద్దరూ ఔట్‌ అయ్యారు. విరాట్‌ కోహ్లీ (18), ఫాప్‌ డుప్లెసిస్‌ (7) స్వల్వ స్కోరుకే ఔట్‌ అయ్యారు. ఈ దశలో విల్‌ జాక్స్‌, రజత్‌ పటిదార్‌లు దూకుడుగా ఆడారు. సిక్స్‌లు ఫోర్లతో చెలరేగడంతో 11 ఓవర్లు ముగిసే సరికి ఆర్సీబీ.. 137/2తో నిలించింది. దీంతో ఈజీగా గెలిచేలా కనిపించింది. కానీ హాఫ్‌ సెంచరీలు పూర్తి చేసుకున్న తర్వాత ఇద్దరూ ఔట్‌ అయ్యారు. విల్‌ జాక్స్‌ 32 బంతుల్లో 55, రజత్‌ పటీదార్‌ 23 బంతుల్లో 52 పరుగులు చేసి ఔట్‌ అయ్యారు.

ఆ తర్వాత కామెరూన్‌ గ్రీన్‌ (6), మహిపాల్‌ లామ్రోర్‌ (4) ఔట్‌ కావడంతో 155/6తో నిలిచి.. కష్టాల్లో పడింది. ఈ సీజన్‌లో విశేషంగా రాణిస్తున్న దినేశ్‌ కార్తిక్‌ క్రీజులో ఉండటంతో ఆర్సీబీ విజయంపై ఆశతోనే ఉంది. కానీ 19 ఓవర్‌లో దినేశ్‌ కార్తిక్ (18 బంతుల్లో 25 రన్స్‌) ఔట్‌ కావడంతో ఆర్సీబీ పోరాటం ముగిసిందని అంతా భావించారు. చివరి ఓవర్‌లో 21 పరుగులు అవసరం కాగా.. ఆర్సీబీ ఓటమి లాంఛనమే అనుకున్నారు. కానీ ఆర్సీబీ ప్లేయర్‌ కర్ణ్‌ శర్మ సంచలన బ్యాటింగ్‌ చేశాడు. మిచెల్‌ స్టార్క్‌ బౌలింగ్‌లో తొలి మూడు బంతుల్లో ఏకంగా 3 సిక్సర్లు కొట్టాడు. అయితే ఐదో బంతికి అతడు ఔట్‌ కావడం, ఆరో బంతికి ఒకే పరుగు రావడంతో ఆర్సీబీ ఒక్క పరుగు తేడాతో ఓడిపోయింది. చివరకు రాయల్‌ ఛాలెంజర్స్‌ బెంగళూరు నిర్ణీత 20 ఓవర్లలో 221 పరుగులకు ఆలౌట్‌ అయింది.

అంతకుముందు బ్యాటింగ్ చేసిన కోల్‌కతా నైట్‌రైడర్స్‌ నిర్ణీత 20 ఓవర్లలో 222/6 పరుగులు చేసింది. కెప్టెన్‌ శ్రేయస్‌ అయ్యర్‌ 36 బంతుల్లో 50, ఫిల్‌ సాల్ట్‌ 14 బంతుల్లో 48 రన్స్‌తో రాణించారు. చివర్లో రమన్‌దీప్‌ సింగ్ 9 బంతుల్లో 24 రన్స్‌తో మెరుపులు మెరిపించాడు. ఆర్సీబీ బౌలర్లలో యశ్‌ దయాల్‌ 2, కామెరూన్ గ్రీన్‌ 2, మహమ్మద్‌ సిరాజ్‌ 1, లుకీ ఫెర్గుసన్‌ 1 వికెట్‌ తీశారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-21T14:36:36Z dg43tfdfdgfd