నరైన్ నిన్ను ఔట్‌ చేస్తా కాస్కో.. విరాట్ కోహ్లీ కామెడీ మామూలుగా లేదుగా!
టీమిండియా స్టార్‌ బ్యాటర్‌, ఆర్సీబీ కీలక ప్లేయర్‌ విరాట్ కోహ్లీ ఐపీఎల్‌ 2024లో పరుగుల వరద పారిస్తున్న విషయం తెలిసిందే. అయితే ఆదివారం కోల్‌కతా నైట్‌ రైడర్స్‌తో మ్యాచ్‌లో విరాట్ చేసిన పని ఒకటి నెట్టింట వైరల్‌గా మారింది. కోహ్లీ చేసిన పనికి స్టేడియం హోరెత్తిపోయింది. ఈ మ్యాచ్‌లో బౌలింగ్ చేసేందుకు సిద్ధమవుతూ కోహ్లీ వార్మప్‌ చేశాడు. దీంతో విరాట్ బౌలింగ్ చూడొచ్చని అంతా భావించారు.. కానీ జోక్‌ చేశా అన్నట్లుగా కోహ్లీ వెనక్కి వెళ్లిపోయాడు.
ఈ మ్యాచ్‌లో టాస్ గెలిచిన ఆర్సీబీ కెప్టెన్‌ ఫాఫ్‌ డుప్లెసిస్‌ తొలుత బౌలింగ్ ఎంచుకున్నాడు. దీంతో ఆర్సీబీ ప్లేయర్లంతా గ్రౌండ్‌లోకి వచ్చేశారు. అయితే ఈ సందర్బంగా నేరుగా అంపైర్ వద్దకు వెళ్లిన విరాట్.. తానే బౌలింగ్ చేసేందుకు సిద్ధమైనట్లుగా క్యాప్‌ను ఇచ్చేశాడు. అనంతరం వార్మప్‌ చేశాడు. ఓపెనింగ్‌ బ్యాటింగ్‌కు వచ్చిన కేకేఆర్‌ బ్యాటర్‌ సునీల్‌ నరైన్‌ను ఔట్‌ చేస్తా.. నీ పని ఖతం అన్నట్లు ఎక్స్‌ప్రెషన్స్‌ ఇచ్చాడు. దీంతో స్టేడియంలోని ఫ్యాన్స్‌తో పాటు, కామెంటేటర్లు కూడా కోహ్లీ బౌలింగ్ చేస్తాడని భావించారు. కానీ తీరా మ్యాచ్‌ ప్రారంభమయ్యే సమయానికి కోహ్లీ అంపైర్ దగ్గరి నుంచి తన క్యాప్‌ తీసుకుని.. ఫీల్డింగ్‌ పొజిషన్‌లోకి వెళ్లాడు. ఈ వీడియో ప్రస్తుతం వైరల్‌గా మారింది.
కాగా ఈ సీజన్‌లో ఆర్సీబీ పేలవ ప్రదర్శన చేస్తోంది. బౌలర్లు తేలిపోవడంతో 180 పైచిలుకు పరుగులను కూడా ఆర్సీబీ కాపాడుకోలేకపోతోంది. దీంతో ఆడిన 7 మ్యాచుల్లో ఆరింట్లో ఓడిపోయింది. ఇది గమనించిన ఫ్యాన్స్.. ఆర్సీబీ ఆడే మ్యాచులకు వెళ్లి కోహ్లీకి బౌలింగ్ ఇవ్వండి అంటూ నినాదాలు చేస్తున్నారు. ముంబైతో మ్యాచ్‌ సందర్భంగా వాంఖడే స్టేడియంలోనూ ఇదే జరిగింది. వద్దురా అయ్యా అన్నట్లుగా కోహ్లీ లుక్‌ ఇచ్చి వాటికి చెక్‌ పెట్టాడు.
కానీ కేకేఆర్‌తో మ్యాచ్‌కు ముందు ప్రాక్టీస్ సందర్భంగా కోహ్లీ బౌలింగ్ ప్రాక్టీస్ చేశాడు. దీంతో ఈ మ్యాచ్‌లో విరాట్ బౌలింగ్ చేస్తాడని అంతా భావించారు. కానీ విరాట్ మాత్రం తన చేష్టలతో నవ్వులు పూయించాడు.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-04-21T13:36:27Z dg43tfdfdgfd
