సన్‌రైజర్స్ ఓటమిని సెలబ్రేట్ చేసుకున్న 9 జట్ల ఫ్యాన్స్.. అదీ ఆరెంజ్ ఆర్మీ రేంజ్..!

ఐపీఎల్ 2024లో భాగంగా ఉప్పల్ స్టేడియం వేదికగా రాయల్ ఛాలెంజర్స్ బెంగళూరుతో జరిగిన మ్యాచ్‌లో సన్‌రైజర్స్ హైదరాబాద్ ఓటమి పాలైంది. ఈ సీజన్లో హైదరాబాద్‌లో ఆరెంజ్ ఆర్మీకి ఇదే తొలి ఓటమి కావడం గమనార్హం. దీంతో ప్రస్తుతం సీజన్లో జట్లన్నీ తమ సొంత మైదానాల్లో ఓడినట్లయ్యింది. ఈ మ్యాచ్‌లో టాస్ గెలిచిన ఆర్సీబీ.. తెలివిగా బ్యాటింగ్ ఎంచుకుంది. కోహ్లి అర్ధ శతకానికి రజత్ పాటిదార్ మెరుపు హాఫ్ సెంచరీ తోడు కావడంతో.. బెంగళూరు 20 ఓవర్లలో 7 వికెట్ల నష్టానికి 206 పరుగులు చేసింది.

ఈ సీజన్లో మూడుసార్లు 260కిపైగా పరుగులు చేసిన సన్‌రైజర్స్ హైదరాబాద్ 207 పరుగుల లక్ష్యా్న్ని తేలిగ్గా చేధిస్తుందని ఫ్యాన్స్ భావించారు. అయితే లక్ష్య చేధనలో సన్‌రైజర్స్ వరుసబెట్టి వికెట్లు చేజార్చుకుంది. 5 ఓవర్లు ముగిసే సరికి 56/4తో నిలిచిన హైదరాబాద్ పీకల్లోతు కష్టాల్లో పడింది. నితీశ్ రెడ్డి, అబ్దుల్ సమద్ కూడా త్వరగా ఔట్ కావడంతో 10 ఓవర్లు పూర్తయ్యే సరికి 6 వికెట్లు నష్టపోయి 89 పరుగులు చేసింది. తర్వాత కమిన్స్ (15 బంతుల్లో 31), షహబాజ్ అహ్మద్ (37 బంతుల్లో 40) ఆదుకోవడంతో సన్‌రైజర్స్ 20 ఓవర్లలో 8 వికెట్ల నష్టానికి 171 పరుగులు చేసింది.

టాప్ ఆర్డర్ బ్యాటర్లు విఫలం కావడంతో బెంగళూరు చేతిలో సన్‌రైజర్స్ 35 పరుగుల తేడాతో ఓటమి పాలైంది. 5 ఓవర్లు ముగిసే సరికే సన్‌రైజర్స్ ఓటమి ఖాయమైంది. అయినా సరే హైదరాబాద్ బ్యాటర్లు ఆలౌట్ కాకుండా చివరి వరకూ బ్యాటింగ్ చేయగలిగారు.

సన్‌రైజర్స్ గెలిచిన ఆర్సీబీ నెల రోజుల తర్వాత ఐపీఎల్ 2024లో తొలి విజయాన్ని నమోదు చేయడంతోపాటు ప్లేఆఫ్స్ అవకాశాలను సజీవంగా ఉంచుకుంది. బెంగళూరులో సన్‌రైజర్స్ ఫ్యాన్స్ ఆర్సీబీని సైలెంట్ చేయగా.. ఇప్పుడు తమ వంతు అన్నట్టుగా ఆర్సీబీ అభిమానులు వ్యవహరించారు. అయితే సన్‌రైజర్స్‌పై బెంగళూరు విజయం సాధించడంతో ఒక్క ఆర్సీబీ అభిమానులు మాత్రమే కాకుండా మిగతా 8 ఫ్రాంచైజీల అభిమానులు సైతం రిలీఫ్‌గా ఫీలవ్వడం గమనార్హం.

ఈ సీజన్లో సన్‌రైజర్స్ భీకరమైన ఆటతీరు కనబరుస్తుండటమే దీనికి కారణం. మిగతా ఏ జట్లకూ అందని రీతిలో సన్‌రైజర్స్ ఈ సీజన్లో మూడుసార్లు 260కిపైగా పరుగులు చేశారు. దీంతో సన్‌రైజర్స్‌తో మ్యాచ్‌ అంటేనే మిగతా ఫ్రాంచైజీలన్నీ హడలిపోతున్నాయి. అలాంటి పరిస్థితుల్లో సన్‌రైజర్స్‌పై ఆర్సీబీ గెలవడం, అది కూడా హైదరాబాద్‌లో గెలవడం.. మిగతా ఫ్రాంచైజీలకు ఊరటనిచ్చింది. సన్‌రైజర్స్ తాము కూడా ఓడించొచ్చనే ధీమాను ఇచ్చింది. దీంతో ఆర్సీబీ విజయం తర్వాత మిగతా 8 జట్ల అభిమానులు రిలీఫ్‌గా ఫీలవుతున్నారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-26T06:23:28Z dg43tfdfdgfd