‘అన్నా నువ్వు ఇచ్చిన బ్యాట్ ఇరిగింది.. ఇంకోటి ఇయ్యరాదే’ కోహ్లికి రింకూ సింగ్ రిక్వెస్ట్

టీమిండియా స్టార్ క్రికెటర్ విరాట్ కోహ్లి యువ క్రికెటర్లను ప్రోత్సహించడంలో ఎప్పుడూ ముందు ఉంటాడనే సంగతి తెలిసిందే. విదేశీ క్రికెటర్లకు సైతం విరాట్ తన బ్యాట్లు, జెర్సీలను గిఫ్ట్‌గా ఇచ్చిన సందర్భాలున్నాయి. ఇక భారత యువక్రికెటర్లకు ఇచ్చే గిఫ్టుల గురించి అయితే ప్రత్యేకంగా చెప్పాల్సిన అవసరం లేదు. ఇటీవల మార్చి 29న బెంగళూరు వేదికగా కోల్‌కతా నైట్‌రైడర్స్, ఆర్సీబీ మధ్య జరిగిన మ్యాచ్ సందర్భంగా రింకూ సింగ్‌కు విరాట్ కోహ్లి ఓ బ్యాట్‌ను బహుకరించాడు.

కోహ్లి లాంటి దిగ్గజ ఆటగాడు గిఫ్ట్‌గా ఇచ్చిన బ్యాట్‌ను మిగతా ఆటగాళ్లు ఎవరైనా జాగ్రత్తగా దాచుకుంటారు. కానీ రింకూ సింగ్ మాత్రం స్పెషల్ కదా.. నెల రోజులు కూడా తిరగక ముందే దాన్ని విరగొట్టేశాడు. ఈడెన్ గార్డెన్స్ వేదికగా నైట్ రైడర్స్‌తో మ్యాచ్ ఆడేందుకు ఆర్సీబీ కోల్‌కతా వెళ్లగా.. ప్రాక్టీస్ సమయంలో కోహ్లి దగ్గరకు రింకూ సింగ్ వెళ్లాడు.

కోహ్లి భాయ్ మీరు ఇచ్చిన బ్యాట్‌ను స్పిన్నర్ బౌలింగ్‌లో విరగొట్టానని చెప్పాడు. నేను ఇచ్చిన బ్యాట్ విరగ్గొట్టావా..? అని కోహ్లి మళ్లీ అడగ్గా అవునని రింకూ బదులిచ్చాడు. స్పిన్నర్ బౌలింగ్‌లో బ్యాట్ విరగొట్టావా..? ఆ బ్యాట్ ఎక్కడ విరిగిపోయింది? అని విరాట్ తిరిగి ప్రశ్నించగా.. అది మధ్యలోకి విరిగిపోయిందని కోహ్లి సమాధానం చెప్పాడు.

మరి అయితే ఇప్పుడు నన్నేం చేయమంటావ్..? అని విరాట్ అడగ్గా.. ఏం లేదన్నా, నీకు చెబుతున్నా అంతే అంటూ రింకూ నసిగాడు. దానికి విరాట్ బదులిస్తూ.. సరేలే.. నోప్రాబ్లమ్, కానీ నువ్వు నాకేం చెప్పాల్సిన అవసరం లేదన్నాడు. ఆ తర్వాత విరాట్ దగ్గర్నుంచి రెండు బ్యాట్లు తీసుకున్న రింకూ సింగ్.. బాల్‌తో ఆడుతూ వాటిని టెస్టు చేశాడు.

వెంటనే విషయం అర్థం చేసుకున్న కోహ్లి.. ఆ బ్యాట్ బాగోలేదని చెప్పాడు. కోహ్లి చెప్పేది పూర్తిగా అర్థం చేసుకోని రింకూ.. మరి నువ్వు ఒక బ్యాట్ పంపిస్తున్నావా..? అని అడిగాడు. నేను ఎవరికి పంపించాలని విరాట్ అడగ్గా.. కోహ్లి కోపాన్ని గమనించిన రింకూ.. ఇదిగో ఈ బ్యాట్లు తీసుకో అంటూ తిరిగిచ్చేశాడు.

‘‘నువ్వు నా దగ్గర్నుంచి ఇంతకు ముందు ఒక బ్యాట్ తీసుకున్నావ్. ఇప్పుడు రెండో మ్యాచ్‌లో రెండు బ్యాట్ తీసుకోవడానికి వచ్చావా..? నీ వల్ల తర్వాత నేను ఇబ్బందులు పడాల్సి వస్తుంది’’ అని కోహ్లి అన్నాడు. దీనికి రింకూ బదులిస్తూ.. ‘నీ మీద ఒట్టు అన్నా, మరోసారి బ్యాట్ విరగ్గొట్టను. విరిగిపోయిన బ్యాట్‌ను కూడా నీకు చూపిస్తా’నన్నాడు.

బ్యాట్ విషయంలో కోహ్లి, రింకూ సింగ్ మధ్య జరిగిన డిస్కషన్‌కు సంబంధించిన వీడియో సోషల్ మీడియాలో వైరల్‌గా మారింది. అసలే ఆర్సీబీ ఒక్క మ్యాచ్‌లోనే గెలిచి పాయింట్ల పట్టికలో అట్టడుగున నిలిచింది. ఇక నుంచి ప్రతి మ్యాచ్‌లోనూ ఆ జట్టు గెలిస్తేనే ప్లేఆఫ్స్ ఆశలను సజీవంగా ఉంచుకుంటుంది. ఇలాంటి పరిస్థితుల్లో, మ్యాచ్‌కు ముందు రింకూ లాంటి విధ్వంసకర ఆటగాడికి కోహ్లి తన బ్యాట్ ఎలా గిఫ్ట్‌‌గా ఇస్తాడు...?

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-21T09:35:51Z dg43tfdfdgfd