గుజరాత్‌ను గట్టెక్కించిన రాహుల్ తెవాటియా.. పాయింట్ల పట్టికలో టాప్-6లోకి గిల్ టీం

ఇండియన్ ప్రీమియర్ లీగ్ 2024లో గుజరాత్ టైటాన్స్ జట్టు నాలుగో విజయాన్ని నమోదు చేసింది. ఆదివారం పంజాబ్ కింగ్స్‌తో జరిగిన మ్యాచులో 3 వికెట్ల తేడాతో విజయం సాధించింది. ఈ మ్యాచులో తొలుత బౌలింగ్ చేసిన గుజరాత్ టైటాన్స్.. పంజాబ్‌ను 142 పరుగులకు కట్టడి చేసింది. అనంతరం లక్ష్యాన్ని మరో

5 బంతులు మిగిలి ఉండగానే 7 వికెట్లు కోల్పోయి ఛేదించింది.

143 పరుగుల లక్ష్యంతో బరిలోకి దిగిన గుజరాత్ టైటాన్స్.. ఆచూతూచి బ్యాటింగ్ చేసింది. కావాల్సిన పరుగులు తక్కువగా ఉండటంతో భారీ షాట్లకు పోకుండా గుజరాత్ బ్యాటర్లు స్ట్రైక్ రొటేట్ చేస్తూ స్కోరు బోర్డును ముందుకు తీసుకెళ్లారు. శుభ్‌మన్ గిల్ (29 బంతుల్లో 35), సాయి సుదర్శన్ (34 బంతుల్లో 31 రన్స్) చేశారు. మిగతా ప్లేయర్లు కూడా నిదానంగా బ్యాటింగ్ చేయడంతో మ్యాచ్ చివర్లో కాస్త ఉత్కంఠగా మారింది. కానీ రాహుల్ తెవాటియా 18 బంతుల్లో 36 పరుగులు చేసి జట్టును గెలిపించాడు. దీంతో గుజరాత్ 19.1 ఓవర్లలో 7 వికెట్లు కోల్పోయి లక్ష్యాన్ని ఛేదించింది. పంజాబ్ కింగ్స్ బౌలర్లలో హర్షల్ పటేల్ 3, లియామ్ లివింగ్ స్టోన్ 2, అర్షదీప్ సింగ్ 1, సామ్ కర్రన్ 1 వికెట్ పడగొట్టారు.

అంతకుముందు బ్యాటింగ్ చేసిన పంజాబ్ కింగ్స్‌కు బ్యాటర్లు శుభారంభం అందించారు. 5.2 ఓవర్లలోనే 52 పరుగులు జోడించారు. దీంతో ఈ మ్యాచులో పంజాబ్ 200 పరుగులు చేసేలా కనిపించింది. కానీ క్రమం తప్పకుండా వికెట్లు పడగొట్టిన గుజరాత్ బౌలర్లు.. మ్యాచులోకి వచ్చేశారు. సామ్ కర్రన్ (20), ప్రభ్‌సిమ్రాన్ (35), రూసో (9), జితేశ్ శర్మ (13), లివింగ్ స్టోన్ (6), శశాంక్ సింగ్ (8), అశుతోష్ శర్మ (3) విఫలమయ్యారు. చివర్లో హర్ ప్రీత్ బ్రార్ 12 బంతుల్లో 29 రన్స్ స్కోరు చేయడంతో పంజాబ్ సరిగ్గా 20 ఓవర్లలో 142 పరుగులకు ఆలౌట్ అయింది. గుజరాత్ టైటాన్స్ బౌలర్లలో సాయి కిషోర్ 4, మోహిత్ శర్మ 2, నూర్ అహ్మద్ 2, రషీద్ ఖాన్ 1 వికెట్ తీశారు.

ఈ విజయంతో గుజరాత్ టైటాన్స్ జట్టు పాయింట్ల పట్టికలో తన స్థానాన్ని మెరుగుపర్చుకుంది. ఆడిన 8 మ్యాచుల్లో నాలుగింట్లో గెలిచి ఆరో స్థానానికి చేరింది. ముంబై ఇండియన్స్, ఢిల్లీ క్యాపిటల్స్ జట్లను వెనక్కి పంపింది.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-21T18:07:10Z dg43tfdfdgfd