ఛాంపియన్స్ ట్రోఫీ కోసం భారత క్రికెట్ జట్టును పాకిస్థాన్కు రప్పించాలని పాకిస్థాన్ క్రికెట్ బోర్డు చేస్తున్న ప్రయత్నాలు ఫలించేలా కన్పించడం లేదు. ఇటీవల పీసీబీ ఛైర్మన్ మోసీన్ నఖ్వీ మాట్లాడుతూ.. ఛాంపియన్స్ ట్రోఫీలో ఆడేందుకు భారత్.. పాకిస్థాన్ వస్తే.. ద్వైపాక్షిక సిరీస్లపై దృష్టి సారించొచ్చని వ్యాఖ్యానించాడు. అయితే బీసీసీఐ వర్గాల ప్రకారం అది సాధ్యం కాదని తేలిపోయింది.
బీసీసీఐ వర్గాల ప్రకారం, వచ్చే ఏడాది పాకిస్థాన్ వేదికగా జరగనున్న ఛాంపియన్స్ ట్రోఫీ 2025లో పాల్గొనేందుకు భారత జట్టు.. దాయాది దేశానికి వెళ్లడం లేదు. అంతేకాదు ఈ ఈవెంట్ కోసం వేదికను మార్చడం లేదా గత ఆసియాకప్ మాదిరిగానే.. హైబ్రిడ్ మోడల్ను తీసుకురావడంపై చర్చలు జరుగుతున్నాయి. అంతేకాకుండా సమీప భవిష్యత్లో పాకిస్థాన్తో ద్వైపాక్షిక సిరీస్లు కూడా జరగడం కష్టం.
"ద్వైపాక్షిక సిరీస్లు కాదు.. కనీసం ఛాంపియన్స్ ట్రోఫీ కోసం కూడా భారత్.. పాకిస్థాన్ గడ్డకు వెళ్లే అవకాశం లేదు. భారత క్రికెట్ జట్టు పాకిస్థాన్ వెళ్లాలంటే కేంద్ర ప్రభుత్వ అనుమతి అవసరం. ప్రస్తుతం పాకిస్థాన్తో సత్సంబంధాలు అంత గొప్పగా లేనందున అది సాధ్యమయ్యేలా కన్పించడం లేదు. ఛాంపియన్స్ ట్రోఫీ అంటే ఐసీసీ ఈవెంట్ కాబట్టి.. దీన్ని డీల్ చేయడం కూడా భారత్కు కాస్త ఇబ్బందే. కానీ ప్రభుత్వ అనుమతి లేనిదే జట్టు వెళ్లదు. ఇక ద్వైపాక్షిక సిరీస్లు సమీప భవిష్యత్లో ఉండకపోవచ్చు" అని బీసీసీఐ వర్గాలు తెలిపాయి.
కాగా చివరిసారిగా 2012-2013లో భారత్-పాకిస్థాన్ జట్ల మధ్య ద్వైపాక్షిక సిరీస్లు జరిగాయి. అప్పుడు పాకిస్థాన్ క్రికెట్ జట్టు.. భారత్లో పర్యటించింది. అప్పటి నుంచి ఇరు దేశాల మధ్య సంబంధాలు దెబ్బతినడంతో ఐసీసీ ఈవెంట్లలో మినహా.. ద్వైపాక్షిక సిరీస్లు ఆడటం లేదు. గతేడాది పాకిస్థాన్ వేదికగా జరగాల్సిన ఆసియా కప్ను కూడా.. హైబ్రిడ్ మోడల్లో నిర్వహించారు. భారత ప్రభుత్వం.. క్రికెట్ జట్టు పాకిస్థాన్కు పంపేందుకు నిరాకరించడంతో ఇది జరిగింది.
ఇక ఈ ఏడాది జూన్లో అమెరికా, వెస్టిండీస్ సంయుక్త వేదికల్లో టీ20 ప్రపంచకప్ జరగనుంది. ఇందులో భాగంగా భారత్-పాకిస్థాన్ జట్ల మధ్య జూన్ 9న మ్యాచ్ జరగనుంది. న్యూయార్క్ వేదికగా ఈ పోరు జరగనుంది.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్స్టైల్ అప్డేట్లు మొదలగునవి తెలుసుకోండి. వీడియోలను TimesXP లో చూడండి. 2024-04-24T03:15:07Z dg43tfdfdgfd