యుజ్వేంద్ర చాహల్ అరుదైన రికార్డు.. ఐపీఎల్‌లో 200 వికెట్లు

రాజస్థాన్ రాయల్స్ లెగ్ స్పిన్నర్ యుజ్వేంద్ర చాహల్ అరుదైన ఘనత సాధించాడు. ఇండియన్ ప్రీమియర్ లీగ్‌లో 200 వికెట్లు తీసిన తొలి బౌలర్‌గా రికార్డు సృష్టించాడు. ముంబై ఇండియన్స్‌తో సోమవారం జరిగిన మ్యాచులో మహమ్మద్ నబీ వికెట్ తీయడం ద్వారా యుజ్వేంద్ర చాహల్ ఈ ఫీట్ సాధించాడు. యుజ్వేంద్ర చాహల్ 2013లో ఐపీఎల్ డెబ్యూ చేశాడు. ముంబై ఇండియన్స్ తరఫున తొలి మ్యాచ్ ఆడాడు. అనూహ్యంగా ముంబై ఇండియన్స్‌తో జరిగిన మ్యాచులోనే 200 వికెట్లు తీసిన బౌలర్‌గా చరిత్ర సృష్టించాడు.

ఇక టీ20 క్రికెట్‌లో చాహల్ కన్నా ముందు మరో ఇద్దరు బౌలర్లు 200 వికెట్లు పడగొట్టారు. ఇంగ్లాండ్ టీ20 బ్లాస్ట్‌లో డానీ బ్రిగ్స్ (219 వికెట్లు), సమిత్ పటేల్ (208 వికెట్లు) ఈ ఫీట్ సాధించారు.

యుజ్వేంద్ర చాహల్ ముంబై ఇండియన్స్ తరఫున డెబ్యూ చేసినా.. ఆ జట్టులో ఎక్కువ అవకాశాలు రాలేదు. దీంతో ఒక్క వికెట్ కూడా ఆ జట్టు తరఫున తీయలేకపోయాడు. 2014 నుంచి 2021 వరకు ఐపీఎల్‌లో రాయల్ ఛాలెంజర్స్ బెంగళూరుకు ప్రాతినిధ్యం వహించాడు. ఆ జట్టు తరఫునే అత్యధికంగా 139 వికెట్లు తీశాడు. ఆర్సీబీ వదిలేయడంతో 2022లో రాజస్థాన్ రాయల్స్‌కు మారాడు. ఆ జట్టు తరఫున 61 వికెట్లు పడగొట్టాడు.

ఇక ఇండియన్ ప్రీమియర్ లీగ్‌లో 50 వికెట్లు తీసిన తొలి బౌలర్‌గా ఆర్పీ సింగ్ నిలిచాడు. 2010 సీజన్‌లో ఈ ఫీట్ సాధించాడు. లసిత్ మలింగ (2013) వంద వికెట్లు, 150 వికెట్లు (2017) పడగొట్టిన తొలి బౌలర్‌గా రికార్డు క్రియేట్ చేశాడు. యుజ్వేంద్ర చాహల్ 200 వికెట్లు తీసిన బౌలర్‌గా నిలిచాడు. 33 ఏళ్ల చాహల్ ఇప్పటివరకు 153 ఐపీఎల్ మ్యాచులు ఆడాడు. ఈ సీజన్‌లో యుజ్వేంద్ర చాహల్ విశేషంగా రాణించాడు. 8 మ్యాచుల్లో 13 వికెట్లు పడగొట్టి.. పర్పుల్ క్యాప్ రేసులో ముందంజలో ఉన్నాడు. జస్‌ప్రీత్ బుమ్రాతో కలిసి సంయుక్తంగా తొలి స్థానంలో ఉన్నాడు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-22T17:10:07Z dg43tfdfdgfd