టీ20 ప్రపంచకప్ రేసులో నేనూ ఉన్నా.. సెంచరీతో సంకేతాలు పంపిన యశస్వి జైస్వాల్

ఇండియన్ ప్రీమియర్ లీగ్ 2024లో రాజస్థాన్ రాయల్స్ ప్లే ఆఫ్స్‌కు చేరువైంది. ఈ సీజన్‌ తొలి అర్థభాగంలో ఆడిన ఏడు మ్యాచుల్లో 6 విజయాలు సాధించిన రాజస్థాన్ రాయల్స్.. రెండో అర్థభాగంలోనూ శుభారంభం చేసింది. ముంబై ఇండియన్స్‌తో జరిగిన మ్యాచులో 9 వికెట్లు తేడాతో గెలుపొందింది. ఈ సీజన్‌లో ఆశించిన మేర రాణించలేకపోతున్న యశస్వి జైశ్వాల్.. సెంచరీతో కదం తొక్కాడు. టీ20 ప్రపంచకప్ రేసులో తానూ ఉన్నాననే సంకేతాలు పంపించాడు.

180 పరుగుల లక్ష్యంతో బరిలోకి దిగిన రాజస్థాన్‌కు ఓపెనర్లు శుభారంభం అందించారు. ఈ సీజన్‌లో ఆశించిన మేర రాణించలేకపోతున్న యశస్వి జైశ్వాల్.. జూలు విదిల్చాడు. తనదైన శైలిలో షాట్లు ఆడుతూ.. మూడంకెల మార్కు అందుకున్నాడు. 35 పరుగులు చేసిన అనంతరం బట్లర్ ఔట్ అయినా.. జైశ్వాల్ మాత్రం జోరు కొనసాగించాడు. కెప్టెన్ సంజూ శాంసన్‌తో కలిసి.. స్కోరు బోర్డును పరుగులు పెట్టించాడు. ఈ క్రమంలోనే 59 బంతుల్లో సెంచరీని పూర్తి చేసుకున్నాడు. ఐపీఎల్‌లో జైశ్వాల్‌కు ఇది రెండో సెంచరీ కావడం గమనార్హం. సంజూ శాంసన్ (38) కూడా రాణించడంతో రాజస్థాన్.. 18.4 ఓవర్లలో వికెట్ నష్టపోయి లక్ష్యాన్ని ఛేదించింది.

అంతకుముందు ఈ మ్యాచులో తొలుత బ్యాటింగ్ చేసిన ముంబై ఇండియన్స్ నిర్ణీత 20 ఓవర్లలో 179/9 పరుగులు చేసింది. వాస్తవానికి ముంబైకి లభించిన ఆరంభం చూస్తే ఇది మంచి స్కోరే. ఈ సీజన్‌లో అదిరే ప్రదర్శన చేస్తున్న రోహిత్ శర్మ, ఇషాన్ కిషన్ జోడీని.. రాజస్థాన్ స్టార్ బౌలర్ ట్రెంట్ బౌల్ట్ తొలి ఓవర్‌లోనే విడదీశాడు. ఆ తర్వాత సందీప్ శర్మ, చాహల్ కూడా వికెట్లు తీయడంతో 20/3, 52/4తో నిలిచింది ముంబై. రోహిత్ శర్మ (6), ఇషాన్ కిషన్ (0), సూర్యకుమార్ యాదవ్ (10), నబీ (23) ఔట్ అయ్యారు. ఈ దశలో తిలక్ వర్మ (45 బంతుల్లో 65 రన్స్), నేహాల్ వధేరా (24 బంతుల్లో 49 రన్స్) జట్టును ఆదుకున్నారు. ఐదో వికెట్‌కు 99 పరుగులు జోడించారు. అయితే చివర్లో వీరిద్దరూ ఔట్ కావడంతో ముంబై 179/9 పరుగులకే పరిమితమైంది.

రాజస్థాన్ రాయల్స్ బౌలర్లలో సందీప్ శర్మ ఐదు వికెట్లతో సత్తాచాటాడు. ట్రెంట్ బౌల్ట్ 2, ఆవేశ్ ఖాన్ 1, చాహల్ 1 వికెట్ పడగొట్టారు. ఈ మ్యాచ్ విజయంతో రాజస్థాన్ రాయల్స్.. ప్లే ఆఫ్స్ బెర్తును దాదాపు ఖరారు చేసుకుంది. ఆడిన 8 మ్యాచుల్లో ఏడింట్లో గెలిచి.. ఎవరికీ అందనంత ఎత్తులో నిలిచింది. పాయింట్ల పట్టికలో అగ్రస్థానానికి చేరింది.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-22T18:40:22Z dg43tfdfdgfd